अब बत्ति गइरहने समस्या समाधान हुन्छ : कुलमान घिसिङ
अब बत्ति गइरहने समस्या समाधान हुन्छ : कुलमान घिसिङ
काठमाडौँलगायत केही स्थानमा बेलाबेलामा विद्युत् जाने समस्या अब समाधान हुने नेपाल विद्युत् प्राधिकरणका प्रमुख कार्यकारी अधिकृत कुलमान घिसिङले बताएका छन् ।चिसाेयामका कारण खपत बढेकाले ट्रान्सफर्मर परिवर्तन गर्दा बिजुली गइरहने समस्या भएको उनकाे भनाइ छ । शुक्रबार पत्रकार सम्मेलन गरेर उनले अहिले देखिएको समस्या क्षणिक भएको र त्यसलाई सुधार्ने काम सुरु भइसकेको जानकारी गराए ।
पुसे झरी लाग्दा चिसो बढेपछि काठमाडौँमा एकाएक विद्युत्को माग बढेका कारण अनामनगर, डिल्लीबजार, इमाडोल, बानेश्वर, रत्नपार्क, महाराजगञ्ज क्षेत्रका ट्रान्सफर्मरले लोड धान्न नसकेका कारण विद्युत्को नियमित आपूर्तिमा समस्या देखिएको बताए ।
उनले भने, ‘करिब ५० देखि ६० वटा ट्रान्सफर्मर ड्रप भएको हो । निरन्तर पानी परेकाले तत्काल फेर्न केही कठिनाइ भएकाले ती क्षेत्रका उपभोक्तालाई असजिलो परेको हो । आजसम्ममा ती ट्रान्सफर्मर फेरिसक्ने गरी काम भइरहेको छ ।’
उनले आगामी दिनमा काठमाडौँ उपत्यकामा विद्युतीय सामग्रीको उपयोग बढ्दै जाँदा विद्युत्को माग पनि बढ्ने आँकलन गरेर उपत्यका वरपर १० वटा सबस्टेसन बन्ने क्रममा रहेको र त्यसबाट १३२ केभी प्रसारण लाइनको विद्युत् आपूर्ति गर्न सकिने जानकारी दिए ।
केही स्थानमा त्यहाँका बासिन्दाले सबस्टेशन बनाउन नदिएकाले पनि समस्या आउने गरेको भन्दै उनले सबस्टेशन बनाउन दिन स्थानीयवासीलाई आग्रह गरे ।
उनले प्राधिकरणले विद्युत् लोडको अवस्था के कस्तो हुनेछ भन्ने अध्ययन गरिरहेको बताए ।
Comments
Post a Comment